Wot knjeza nutřkowneho ministra Schäubla wšako smy w poslednim času mnoho słyšeli, kak wón přeco dale nas wšěch kontrolować a z tym našu swobodu wobmjezować chce. Nětko hrozy wón wšěm, kotřiž chcedźa přećiwo G8-wjerškej protestować, zo jich hižo do toho do kłódy tyknje (je to tak mjenowana "zadźěwanska" jatba, němsce "Vorbeugehaft"). Štyri mysle přińdu mi k tomu.
Sprěnja dopomina mje to na film „Minority report“, hdźež tohorunja ludźi zajachu, prjedy hač tući něšto skućichu. Wěmy, kak so ta wěcka we filmje skónči ...
Zdruha kriminalizuje so z tym kóžde hibanje a měnjenje, kotrež tróšku wotchilace je, a štó wě, kak daloko to hišće póńdźe. Druhdy sej myslu, zo smy kónc 1989 přezahe juskali, jako so statna wěstota spowali.
Střeća je so tehdy tón zakoń, na kotryž so minister nětko powoła, wobzamknył, zo bychu pječa hooliganow před sportowymi wubědźowanjemi do jastwa tyknyć móhli. Nětko so woprawdźity zaměr tuteho zakonja wukopa, a dyrbimy jara kedźbować, hdyž naši politikarjo wo dalšich tajkich zakonjach rěča – pječa přećiwo „normalnym“ złóstnikam měrjene, hodźa so tež přećiwo druhim njelubym mocam zasadźować – na přikład lěwicarskim demonstrantam.
A štwórty dypk – hdy so tutón minister skóčnje pušći? Je so sam z woporom atentata stał, a to je jeho zawěsće traumatizowało. Mjeztym so jasnje pokaza, zo njeje swojim nadawkam psychisce zrosćeny. Pósćelće jeho na wuměnk, hdźež našej demokratiji wjace njezeškodźi!
Keine Kommentare:
Kommentar veröffentlichen