Serbski planet

Před krótkim je so w swětnišću wokoło čerwjeneje małeje hwězdy Gliese 581 prěni planet namakał, na kotrymž je pječa žiwjenje a wobsydlenje móžne.

Temperatura na powjerchu trochuje so na 0 do 40 stopnjow, tak zo najskerje njeby trjebała so jutrowna woda ekstra roztać. Planet je někak połdra raza tak wulki kaž Zemja a ma pjeć króć telko masy. To rěka, zo ludźo ze zmijom najskerje tola radšo na Zemi wostanu a zo bychmy drje dyrbjeli swoje zežiwjenske zwučenosće přestajić, chcemy-li tam jutry dale na konjach jěchać. Chibazo so přewučimy na motorskich jezdźić, stož by zawěsće tež atraktiwitu delnjołužiskeho łapanja kokota powyšiło. Problematiske budźe to, zo traje lěto tam jenož 13 dnjow. Na přichodnej hłownej zhromadźinje Domowiny budźe so tohodla wothłosować, kotre nałožki maja so preferować. Po netčišich dopoznaćach wědomostnikow je planet pak jara skałaty pak w dalokej měrje z wodu pokryty. We woběmaj padomaj pak njeje žadyn wulki problem za nas, wšak smy zwučeni, zo sej krajinu najprjedy rjenje za žiwjenje spřihotujemy (zo by ju nam potom něchtó zaso zebrał).

Předsydstwo Domowiny hižo planuje swój přeni wopyt na nowym planeće, kiž je wokoło dwaceći swětłowych lět wot Zemje zdaleny. Na wčerawšim nuznym posedźenju domowinskich towarstwow je so jednohłósnje rozsudźiło, zo ma sej cyły prezidij naraz tam dolećeć. Serbske mjeno planeta pak wostanje dale njejasne. Při prěnim wothłosowanju njeje so žadyn z dotalnych namjetow přesadźił: Hajptun, Merkurjawa, Twojarić, Čerwjeny punk, Peple-Wenus a Gnac.